புதுத் தேடல்

[சுதந்திரா]

எது பிடிக்கும்
என்று யாராவது கேட்டால்
சொல்லத் தெரியவில்லை

அதெப்படி முடியும்
இத்தனை பெரிய உலகில்
இது மட்டும் தான்
என்று ஒரே வினாடியில்
கைகாட்டிட...

இப்பொழுது நான் உணரும் அமைதி
இருள் விளக்கிய இந்த நிலா
தென்னோலைகளின் அழகான உரசல்
என் அனுமதியே வேண்டாமல்
எனை தீண்டும்
இந்தக்குளிர் காற்று
அடிக்கடி அதை மொத்தமாய்
வாங்கிக் கொள்ள முயலும்
என் ஆழமான மூச்சுச் சத்தம்

அத்தனையும் பிடித்திருக்கிறது
இந்தக் கணத்தில்
இந்த மனநிலையில்

"பிடித்தது ஏதோ... கிடைக்கவில்லையே"
என்ற ஏமாற்றம் போலும்
இழப்புக்களின் முடிவில் தானே
தேடல்கள் துவங்குகின்றன!!!