அத்தியாயம் – 7
பேச மொழி தேவையில்லை
பார்த்துக் கொண்டால் போதுமே
தனிப்பறவை ஆகலாமா ?
மணிக்குயில் நானுமே !
சிற்பம் போல செய்து என்னை
சேவித்தவன் நீயே நீயே
மீண்டும் என்னை கல்லாய் செய்ய
யோசிப்பதும் ஏனடா – சொல்
யாருமில்லா தனியரங்கில்
ஒரு குரல் போலே
நீ எனக்குள்ளே
எங்கோ இருந்து நீ
என்னை இசைக்கிறாய்
இப்படிக்கு உன் இதயம்
ரம்யா கேட்ட கேள்வி புரிந்ததா புரியவில்லையா என்றே அவனுக்குப் புரியவில்லை. ஆத்திரப்படும் அப்பாவை நினைக்க முடிந்தது. ஆனால் அழும் அம்மாவை.! வேண்டாம் மகனே என்று சொல்லி அம்மா அழுதால்…. நினைப்பதற்கே அவனுக்கு அசிங்கமாக இருந்தது. அந்த அசிங்க நினைப்பே அவன் வாயையும் மூடி வைத்தது.
“என்னடா அமைதியாயிட்ட?” கேட்ட ரம்யாவைப் பாவமாகப் பார்த்தான் ரித்விக். முகத்தில் குழப்பமும் கவலையும் கூட்டணி அமைத்திருந்தன. வாய் திறந்து அவனால் பேச முடியவில்லை. காதலும் குழப்பம், காதலிலும் குழப்பம். என்ன செய்ய போகிறேன் புரியவில்லை அவனுக்கு.
“பாத்தியாடா…. அப்படி ஒரு நிலமை வந்தா என்ன முடிவை நீ எடுப்பன்னு உன்னால யோசிச்சுக்கூடப் பாக்க முடியலை. அதுனாலதான் ஒரு பதிலும் சொல்ல மாட்டேங்குற. ஜித்து தன் காதலைச் சொன்னதும் சித்ரா ஒத்துக்கிட்டா. ஏன்? அவன்கிட்ட இருந்த உறுதி. தன்னை எப்பவும் ஜித்து கலங்க விடமாட்டான்னு சித்ராவால நம்ப முடிஞ்சது. அப்படியொரு நம்பிக்கைய என் மனசுல உன்னால உண்டாக்க முடியலையேடா. “நீ அப்படி இல்லையே என்கின்ற அவளது இயலாமை அந்தக் குரலில் வெளிவந்தது.
சுஜித்திற்கும் சித்ராவுக்கும் ரம்யா என்ன சொல்ல வருகிறாள் என்பது புரிந்தது. ஆனால் ரித்விக் ஒன்றும் சொல்லாமல் தலையைக் குனிந்துக் கொண்டான்.
ரம்யா அவனது கன்னத்தில் கை வைத்து முகத்தை நிமிர்த்தினாள். அவள் தொட்டது தீக்கங்கு கன்னத்தில் பட்டது போல இருந்தது அவனுக்கு. படக்கென்று நிமிர்ந்தான். “டேய். நீ நல்லவன். அதுல எந்தச் சந்தேகமும் எனக்கு இல்ல. உன் மேல உண்மையான அன்பு எனக்கும் இருக்கு. ஆனால் காதல் வரனும்னா… உன்னுடைய அன்பும் அழகும் மட்டும் போதாதுடா… ஏதோ குறையுது. உன்ன இன்னைக்குக் காதலிக்கத் தொடங்கீட்டு…. நாளைக்கு அம்மா அழுதாங்க ஆட்டுக்குட்டி உழுதாங்கன்னு சொல்லி வேற எந்த முடிவு எடுத்தாலும் கஷ்டம் எனக்குத்தான். உனக்குந்தான் கஷ்டம். ஆனா அது நீ எடுத்த முடிவு. அதுக்காக நானும் ஏன் கஷ்டப்படனும்?” தனக்குள் இருந்தக் காதலை மறைத்து நிதர்சனத்தைப் பேசினாள் பெண்.
“ரம்யா… உனக்கு இப்ப சொல்ல பதில் இல்ல. எனக்குத் தெரியலை. என் பேரன்ட்ஸ் அப்படி நடப்பாங்கன்னு நான் யோசிக்கல, உனக்கு விருப்பம் இல்லன்னா இனி நன் பேசலே. ஆனா நன் ப்ரீத்தி நிஜா. அது நிஜா ஆகுத்தே. இனி இது பகே பேசலை. பேச வேண்டாம்.” என்றவன் மூவரையும் பார்க்காமல் நகர்ந்து தனிமையை நாடி சென்று விட்டான்.
தாஜ்மகால் கல்லறையாமே. அதனால்தான் அங்கு வைத்துக் காதலைச் சொன்னதும் சோகம் உண்டானதோ. ம்ம்ம்.. என்னவோ… இவர்கள் இருவருக்கும் உண்மையிலேயே காதல் வரத்தான் போகிறதா? இல்லை… ஏற்கனவே வந்து விட்டதா? வரவே வராதா? ரம்யாவின் கேள்விகளும் சரியாகத்தான் தெரிகின்றன. அப்படி எதுவும் யோசிக்காததால் ரித்விக்கின் காதல் பொய்யான காதலாகி விடுமா என்ன? பொறுத்திருந்து பார்க்கலாம்.
சிறிது நேரத்திற்குப் பிறகு அனைவரும் கிளம்பி வெளியே வந்தனர். ரம்யா தாஜ்மகால் பொம்மைகள் வாங்க விரும்பினாள். அழகாக பளிங்குக் கற்களில் செய்திருந்த தாஜ்மகால்கள் அவளை ஈர்த்தன. ஆனால் பேரம் பேசி வாங்க வேண்டுமே. ரித்விக் தான் பேரம் பேசினான். யோசித்து யோசித்து ஒன்று.. இரண்டு… மூன்று.. நான்கு என்று வாங்கினாள். அட்டைப் பெட்டியில் காகிதச்சுருகளை வைத்துக் கட்டிக் குடுத்தார்கள். வாங்கிக் கொண்டு டாக்சியை நோக்கி நடந்தார்கள்.
கே.ஆர்.எஸ் சிரித்துக் கொண்டே வரவேற்றான். “ஆயியே சாப். முடிஞ்சதா? அடுத்து எங்க போகனும்?” மணி நான்கு தான் ஆகியிருந்தது. வேறெங்கும் போவார்கள் என்று நினைத்துக் கேட்டான்.
அன்றைய திட்டப்படி பார்க்க வேண்டிய இடங்களை எல்லாம் பார்த்து விட்டதால் வீட்டிற்குத் திரும்ப முடிவு செய்திருந்தான் சுஜித். அதற்கு முன் அலைந்த களைப்பில் முதலில் டீ குடித்தார்கள்.
காரில் ஏறப் போகையில் ரம்யா உள்ளே உட்கார கதவைத் திறந்தான் ரித்விக். “நான் முன்னாடி உட்காந்துக்குறேன் ரித்து. வரும் போது பேசிட்டே வந்ததால ஊரெல்லாம் பார்க்கலை. இப்பப் பாத்தாத்தானே உண்டு. இதுக்காகன்னு எப்ப வரப் போறோம்.” எனச் சொல்லிக் கொண்டே முன்னால் ஏறினாள் ரம்யா. ஏறியவளைப் பார்த்துச் சிரித்தான் கே.ஆர்.எஸ். அவனை கண்டுகொள்ளாமல் அமைதியாக உட்கார்ந்தாள்.
சுஜித்தும் சித்ராவும் பின்னாடி ரித்விக்கோடு உட்கார்ந்து கொண்டார்கள். அவர்களின் விஷயத்தைப் பற்றி இப்பொழுது பேச வேண்டாம் என்று இருவரும் முடிவெடுத்திருந்தார்கள். வேறொரு நல்ல சமயமாகப் பார்த்துப் பேசி முடிவுக்கு வர விரும்பினார்கள். அதனால் அவர்களும் அமைதியாகவே அமர்ந்தார்கள். குழந்தையும் அலைச்சலில் சினுங்க தொடங்கியிருந்தது.
தன்னோடு உட்காராமல் முன்னாடி சென்று ரம்யா உட்கார்ந்தது காதலனான அவனுக்கு வலித்தது. என்னென்ன அவன் மனதில் ஓடின என்பதே அவனுக்குப் புரியாத அளவுக்கு வேகமான சிந்தனைகள். வீடு வர இன்னும் மூன்று மணி நேரங்கள் ஆகும். அதுவரை இப்படித்தான் சிந்தித்துக் கொண்டே இருக்கப் போகிறானா? அதற்கு அப்புறமும் சிந்திக்காமலா இருக்கப் போகிறான்?
ஆனால் ஒன்று. நடந்த நிகழ்ச்சி அவனுக்குள் எதையோ மாற்றி விட்டது. அது என்னவென்று அவனுக்கும் புரியவில்லை. பழைய ரித்விக் இல்லை அவன். காதல் வந்தால் ஒருவன் மாறித்தான் ஆக வேண்டுமா என்ன? யாரய்யா கண்டுபிடித்தது இந்தக் காதலை. அவர் மட்டும் கண்ணில் பட்டால் அவரைச் சப்பாத்தி மாவு பிசைந்திருப்பான். என்ன செய்வது.. கடவுள் எல்லாருக்கும் எப்பொழுதும் கண்ணில் தெரிவதில்லையே. ஏதோ அவருக்கு நல்ல நேரம்.
ரம்யாவின் மனதிற்குள் வேறு விதமான சிந்தனைகள். சற்று அதிகமாகவே பேசி விட்டோமோ என்றும் கூட யோசித்தாள். ஆனாலும் அவளது கேள்விக்கு விடை கிடைக்காதது ஏமாற்றமாகவே இருந்தது. “யார் சொன்னாலும் நீதான் வேணும்னு வந்திருவேன்” என்று அவன் சொல்லிருந்தால் நன்றாக இருந்திருக்குமோ என்று நினைத்தாள். அப்படி அவன் சொல்லியிருப்பான் என்று நினைப்பதே இனிமையாக இருந்தது. ஆனால் சொல்லவில்லை என்ற அப்பட்டமான உண்மை கசந்தது.
இப்படி ஒவ்வொரும் ஒவ்வொரு சிந்தனையில் இருக்கையில், எதைப் பற்றியும் யோசிக்காமல் கார் நொய்டாவை நோக்கி விரைந்தது. அனைவரும் அவரவர் சிந்தனையில் இருக்க திடிரென சத்தமிட்டுக் கத்தினாள் ரம்யா.
தொடரும்..