“ம்.. இந்த மாதிரி டைம்ல இலகுவான சாப்பாட்டை எடுத்துக்கணும்னு யூட்டியூப்ல பார்த்து தெரிஞ்சுக்கிட்டேன். அது மட்டும் இல்ல நிறைய சாப்பிடணும், நல்லா ரெஸ்ட் எடுக்கணும், இன்னும் நெறைய விஷயங்கள் அதுல சொல்லி இருக்காங்க” என்று சொல்லி நேற்று செய்யாததை எல்லாம் தற்போது செய்து கொடுத்தான். நல்லெண்ணையில் முட்டை உடைத்து ஊற்றி கொடுப்பதாகட்டும், இனிப்புகள் அதிகமாக கொடுப்பதாகட்டும், இன்னும் பிற உடலுக்கு வலு தரும் உணவுகளாகட்டும் அனைத்தையும் கொடுத்து சாப்பிட சொன்னவன், “எனக்கு உளுந்தங்களி செய்ய தெரியாது விமலா அக்காக்கிட்ட சொல்லி இருக்கேன் அவங்க செஞ்சு கொண்டு வந்து கொடுத்ததும் மறுக்காம வாங்கி சாப்பிடும்மா. அப்ப தான் உடம்புல ஸ்ட்ரென்த் இருக்கும் சரியா” என்றதும் சரி என்று தலையை உருட்டினாள் சங்கரி.